1 patay, 2 angol sa 2 shooting sa siyudad

CEBU, Philippines - Usa patay ug duha ang naangol sa pagpamusil kagahapon sa B. Aranas Extension barangay Duljo-Fatima pasado alas 6:00 sa kagabhion. Ang biktima mao si Alvin Padilla Cabigon, 27, molupyo sa naghisgutang lugar.

Sa imbestigasyon sa Cebu City Police Office (CCPO) ang biktima anaa sa pultahan sa gym sa maong barangay diin kalit kini gipusil sa suspetsado nga si Nelson Abala ug molupyo sa maong lugar sa wala matinong rason.

Ang biktima samdan sa walang bahin sa lawas ug walang bukton ug daling gidala sa Miller Hospital apan gideklarar kini nga dead on arrival (DOA) samtang ang suspetsado daling nakahawa sa maong lugar human sa krimen.

Matud sa impormante nga si Aljun Padilla nga sa wala pa ang maong pagpamusil ang biktima ug ang suspetsado adunay panagbangi kaniadto.

Samtang usa ka 9-anyos ang naangol human sa pagpamusil nga ang tuyo mao ang usa ka Allan Tabanao Aquino, 34, driver sa V-hire ug molupyo sa Rizal Avenue Extension sa baranggay Basak-San Nicolas pasado alas 4:45 sa hapon.

Base sa imbestigasyon, ang biktima naglakaw sa nahisgutang lugar sa dihang kalit miabot ang duha ka suspetsado nga mao si Marialito Librado alayas “Itoy” ug ang angkas niini nga wala mailhing lalaki sakay sa itom nga motorsiklo ug daling mipusil sa tuong bahin ug bukobuko sa biktima sa wala mailhing rason.

Ang biktima nga 9-anyos nga batang babaye nagsakay og traysikad naangin sa maong pagpamusil ug nakaangkon og samad tinapsingan sa agtang niini samtang ang mga suspetsado daling nakapadagan sa motor padulong habagatang bahin.

Ang duha ka biktima daling gidala sa Cebu City Medical Center. (BANAT NEWS)