Asawa sikop sa buybust

CEBU, Philippines - Nasikop sa kapolisan ang usa ka asawa kinsa nasakpang naghupot og ginadiling drugas didto sa sitio Looc, barangay Maribago, dakbayan sa Lapulapu   sa miaging gabii.

Ang suspetsado mao si Norma Alindajao, hingkod, nga taga Looc. Si P/Insp. Glenn Gepe sa kapolisan sa Lapulapu kinsa maoy nangulo sa maong operasyon sa buybust, mibutyag nga dugay na nilang gipanid-an ang maong magtiayong Alindajao gumikan sa taho nga kini maoy usa sa tinubdan sa illegal nga drugas sa maong dapit.

Apan sa pag-abot nila sa balay sa mga suspetsado, nakasabot si Dominador Alindajao, ang bana sa nadakpan nga mga kapolisan ang mopalit og shabu hinungdan nga mikaratel kini og dagan pahilayo sa ilang balay.

Ang asawa nga si Norma maoy naabtan sa kapolisan sa sulod sa ilang balay   nga nakuhaan og 15 ka mga gagmay’ng pakete sa gituohang shabu lakip na sa wala matinong kantidad sa salapi nga gituohang ilang halin sa illegal nga drugas.

Mikagulkol na karon sa prisohan si Alindajao, samtang nagpahayahay pa ang iyang bana sa gawas apan gipangita na kini sa kapolisan aron masikop ug kapasakaan usab og kaso sama sa atubangon nga kaso sa iyang asawa. - BANAT NEWS