CEBU, Philippines - Naputos sa samad ang kalawasan sa usa ka drayber sa sikad-sikad human kini lubaa sa wala hiilhi niyang pasahero didto sa Sitio Tac-an barangay Taboc siyudad sa Danao kagahapon sa alas 12:15 sa sayong kaadlawon.
Ang biktima mao si Jover Duarte Banson, 31, ulitawo, drayber sa sikad-sikad nga taga barangay Guinacot, dakbayan sa Danao.
Si PO2 Marlon Remullo sa Danao City Police mibutyag sa Banat News nga samtang namasahero ang biktima sa Danao Terminal, gisakyan siya og usa ka pasahero kinsa nagpahatod kaniya ngadto sa barangay Taboc sa maong dakbayan.
Apan dihang nahiabot na sila sa maong lugar mimando kini sa drayber nga pahunongon kay manaog siya ug dihang gipaningil sa iyang plite, imbis kuwarta ang kuoton gikan sa bulsa, kutsilyo na hinuon ang gilanit dayong deklarar nga tulis.
Busa milihok dayon ang biktima kay mosukol sa tulisan apan gidunggab kini makadaghang higayon, ug maayo nalang kay bisan samaron nakadagan pa ang biktima ug gibiyaan niya ang iyang sikad–sikad.
Ang molupyo nga nakasaksi maoy mihatod kaniya ngadto sa Danao District Hospital apan gi-transfer usab kini sa tambalanan sa dakbayan sa Sugbo. Gipangita pa sa kapolisan ang tulisan. - Darrel A. Carumba ug Romeo T. Limpangog (BANAT NEWS)