Lolo natagak sa pangpang patay

CEBU, Philippines - Usa ka 81 anyos nga lolo nga liso og pangisip nakabsan sa kinabuhi human kini matagak sa pangpang didto sa barangay Campisong, sa lungsod sa Ginatilan sa miaging adlaw.

Ang biktima mao si Eutropio Pacaldo Intes, ulitawo, nga taga barangay Campisong.

Nasayran gikan sa kapolisan sa Ginatilan nga ang manag- agaw nga sila si Estrella Dimol, 51, ug Nilo Birongan, 38, maoy mipahibawo kanila nga nahanaw ang ilang lolo nga may deperensiya na sa pangisip tungod sa katiguwangon, niadto pang Disyembre 1 ning tuiga.

Apan miabot na lang og upat ka adlaw gikan sa ilang pagpangita wala na gyud nila kini hikit-i hinungdan nga nangayo sila og ayuda sa barangay ug gilusad dayon ang all out search sa mga opisyal sa ilang lugar.

Sa ilang pagsuhid sa tibuok Campisong, napalgan nila si Pacaldo ubos sa usa ka pangpang nga adunay gitas-ong 1, 800 ka tiil nga padulong na sa pagkadugta.

Ang kapolisan nagtuo nga aksidente ang pagkatagak sa pangpang sa biktima ug wala sila magtuo nga may foul play ang iyang kamatayon. - BANAT NEWS