Oposisyon sa talisay mireklamong dili patas ang pagtagad sa ilang hangyo

CEBU, Philippines - Mireklamo ang oposisyon sa dakbayan sa Talisay tungod sa padayong dili patas nga pagtagad kanila diha sa dakbayan ilabi na pag-abot sa pagkuha og mga i-endorsong mga empleyado diha sa dakbayan.

Sumala pa nga ang mga sakop sa oposisyon nga nakadaog sa milabay’ng piniliay diin duha ka mga taga oposisyon ang nakalingkod sa pagka-konsehal nagpabiling duha lang gihapon ang ilahang gitugot kanila nga quota sa job orders samtang ang mga sakop sa administrasyon dunay 20 ka mga quota.

Si Konsehal Romeo Villarante mibutyag sa mga tigbalita nga niadtong milabay’ng adlaw gipangayoan na sila og mga pangalan sa ilang quota nga ilahang i-endorso aron makatrabaho sa city hall.

Matud ni Villarante nga silang tulo ni Konsehal Danny Caballero ug Val Ylanan kinsa kanhi ubos sa landong sa administrasyon gitugutan lang makakuha og empleyado og tag duha ka buok.

Gibutyag ni Villarante nga mihangyo na sila niini ngadto sa ilang mga kauban sa konseho nga mayoriya mga kaalyado sa administrasyon nga mapun-an ang ilang mga quota bisan man lang og lima ka buok matag usa kanila apan igo lang silang gisanong apan wala tumana.

Gipadayag sa nahisgutang konsehal nga dili patas ang pagtagad ngadto kanila sa ilang mga kauban sa konseho kini bisan paman unta pareho silang gipili sa mga Talisaynon.

Apan bisan pa sa maong kasinatian si Villarante mipasalig nga dili sila mahitabong motapon o mopaubos sa landong sa administrasyon.

Kaniadto si Ylanan sakop sa administrasyon apan tungod sa mga isyu niadtong milabay’ng piniliay nga diin siya nadudahang misuporta og taga oposisyon nagpabilin ang pagduha-duha kaniya.

Kini maoy hinungdan nga mitapon si Ylanan sa oposisyon.

Ang Banat News mitawag sa mga numero sa cellular phone ni Bise Mayor Alan Bucao aron makuhaan kini og pamahayag kabahin sa maong pasangil sa oposisyon apan dili ma-contact ang mga numero sa cellular phone niini. (BANATNEWS)