Hugaw sa tawo ang hinungdan sa diarrhea

CEBU, Philippines - Gitutukan karon sa kagamhanan sa lalawigan sa Sugbo ang pagtabang sa mga biktima sa diarrhea outbreak sa tulo ka mga barangay didto sa dakbayan sa Danao.

Matud pa ni Integrated Provincial Health Officer, Dr. Cristina Diango nga nagpadayon na ang pag-ayuda sa kagamhanan sa lalawigan sa Sugbo sa mga nabiktima sa diarrhea outbreak nga nalandig sa tambalanan sa Danao district hospital.

Matud pa ni Diango nga niabot na og 159 ang gidaghanon sa mga biktima sa diarrhea outbreak sa maong dakbayan ug nanghatag na sila og mga tambal sa mga biktima.

Samtang gipahibawo usab niini nga gisugdan na usab sa Kapitolyo ang pag-rehabilitate sa water source sa mga lugar nga naapektohan sa diarrhea outbreak. Hinuon giklaro ni Diango nga ang 159 ka mga biktima nga natala sa Provincial Health Office gikan Nobiyembre 24 hangtud kagahapon nagagikan sa tulo ka mga barangay sa Taytay, Tabok ug Cambanay.

Giingong hugaw sa tawo gikan sa tubig sa water works facility ang hinungdan nga daghang nagkalibanga nga miresulta pa sa kamatayon sa duha ka mga bata sa niaging adlaw.

Kini subay sa preliminary result sa water sample nga nasuta sa Regional Epidemiology and Disease Surveillance Unit.

Tungod niini mipagawas dayon og rekomendasyon ang RESU-7 lakip na niini ang klarong implementasyon sa Sanitary Code nga nagdili na pagtukod og mga balay sulod sa 20 metros gikan sa water facility.

Lakip sa rekomendasyon mao ang pag-ayo sa mga manhole ug ang paglimpiyo sa tabon sa mga tangke sa water facility nga himuon matag unom ka buwan gikan sa mga tangke sa tubig aron masigurong luwas ang katawhan nga mogamit ug moinom sa tubig.

Si Dr. Susana Madarieta, director sa DOH Central Visayas malaumon nga pinaagi sa gihimong aksyon hingpit nang mokunhod ang matakbuyan sa maong sakit. (BANAT)