CEBU, Philippines - Gipa-autopsy sa kapolisan ang patay’ng lawas sa usa ka babaye nga naghikog gumikan sa giingong pagselos niini sa iyang kapuyo.
Matud pa ni PO2 Nilon Suico sa kapolisan sa Consolacion nga ila lang gisiguro nga walay foul play ang kamatayon ni Charlyn Mondejar.
Si Mondejar giingong nagselos sa iyang kapuyo nga si Joseph Rosales Goc-ong dihang nabasa ang cell phone niini nga may mensahe sa usa ka babaye.
Niadtong Sabado sa buntag, nagpunay og hilak ang upat ka buwan pa lang nga anak ni Mondejar sulod sa ilang gipuy-ang balay ug maoy hinungdan nga gisil-ing kini sa iyang ugangang babaye.
Mao nalay pagkakurat sa ugangan dihang nakita nga nagbuy-od na sa sawog si Mondejar nga wala nay kinabuhi samtang gihiktan og pisi ang liog niini. Si Goc-ong dihang gisukit sa kapolisan mibutyag nga wala siya mamabaye. (BANATNEWS)