Grado ni Loot 101%

CEBU, Philippines - Gihatagan ni Bise Gob. Gregorio Sanchez, Jr. og grado nga 101 porsiyento si Daanbantayan Mayor Maria Luisa Loot samtang uno porsiyento lang kang Gob. Gwendolyn Garcia.

Kini atol sa pakigpulong ni Sanchez sa pagpahural sa mga bag-ong napiling mga opisyal sa barangay ug Sangguniang Kabataan niadtong Huwebes sa gabii sa maong lungsod.

Matud pa ni Sanchez nga ang gipakitang hiyas ni Loot mahimo na nga usa ka gobernador sa lalawigan sa Sugbo nga mas angayan kaysa kang Garcia.

Si Loot gihulagway ni Sanchez nga angayan, may kaisog ug may maayong batasan nga dili makita sa kasamtangang gobernador.

Gitumbok ni Sanchez ang kaisog ni Garcia nga igo lang sa pagpanglabay og bolpen sa iyang mga department heads matag ipatawag nga tigum samtang si Loot isog sa insaktong pagdumala sa katawhan.

Sukad nagkabangi si Loot ug Garcia, wala na gyud makatambong ang gobernador sa mga kalihukan sa lungsod ug si Sanchez na ang kanunay’ng dapiton sa mayor.

Si Sanchez midaug sa lungsod sa Daanbantayan sa miaging eleksiyon lakip na ang kandidato sa pagka-gobernador nga si Hilario Davide III bisan si Loot nagsuporta sa grupo ni Garcia ug Glenn Soco. – BANAT NEWS