CEBU, Philippines - Gikatakdang ipahigayon ang public hearing alang sa gipangayong umento sa pletihan sa mga public utility vehicles ug taksi karong Disyembre 9 niining tuiga.
Si Benjamin Ryan Yu nga chairman sa Cebu Integrated Transport Services Cooperative (CITRASCO) miingon nga ilang gipanghinaot nga mosabot lamang usab sa ilang kahimtang ang mga sumasakay sa ilang tinguha nga pagpausbaw sanglit wala man silay kapilian niining mga panahona.
Gipasabot niya nga kinahanglang P1.50 ang usbaw sa minimum nga plitehan nga giisip nilang maoy tubag sa ilang panginahanglan sa giabaga nga galastohan sa maintenance sa ilang sakyanan ug sa nagkamahal nga spare parts niini. Sa nasayran nga ang CITRASCO ug uban pang mga kahugpongan sa mga drayber ug operators sa Sugbo ang nagkahiusa sa pagpadangat sa ilang petisyon ngadto sa buhatan sa Land Transportation Franchising and Regulatory Board (LTFRB) 7 alang sa pagpangayo og usbaw sa minimum nga plitehan.
Samtang ang mga taxi operators buot usab og dugang P10 sa flag down rate sa ilang mga units, kini nagpasabot nga P40 na ang minimum ini og lingkod sa pasahero sa taksi.
Kun tugutan sa LTFRB ang minimum nga plitehan sa PUJ gikan sa P6.50 sa matag lima ka kilometro mahimo na kining P8. – BANAT NEWS