CEBU, Philippines - Napusilan sa usa ka batan-on ang usa ka electrician sa barangay human kini mamadlong sa napangihi didto sa sitio Ylaya sa barangay Marigondon sa dakbayan sa Lapulapu sa milabay’ng gabii.
Ang biktima mao si Jaime Sollano, 50, residente sa maong dapit kinsa nakaangkon og samad pinusilan sa lawas gikan sa gituohang pugakhang.
Usa sa gitumbok nga mipusil sa biktima mao si Rudy Casiban ug usa ka wala mailhing lalaki.
Sa imbestigasyon ni SPO2 Ernesto Francisco sa Homicide Section alas 9:30 sa milabay’ng gabii atol sa kapistahan sa maong dapit nasigpatan sa biktima ang grupo sa mga batan-on nga nangihi sa dili ensaktong dapit hinungdan nga gibadlong kini ni Sollano.
Apan nasuko ang mga batan-on ug ang usa nga armado diay og pugakhang mipusil sa biktima makausa ka higayon dayon ang usa mibunal kaniya og botelya sa beer dayon nanagan, ang mga kabanay sa biktima na maoy midala niini sa Lapulapu City District Hospital.
Matud pa ni Sollano nakaila ang mga pag-umangkon niini sa mga mipusil kaniya. (BANAT)