CEBU, Philippines - Patay ang usa ka wala hiilhing lalaki human kini pusila sa wala hiilhing kriminal didto sa sitio Magay, barangay Tanke, dakbayan sa Talisay kagahapon sa kaadlawon.
Ang biktima kinsa nakaangkon og usa ka samad pinusilan sa likod nga bahin sa iyang ulo gibana-banang nagpanuigon og 30-anyos, nagsul-ob og yellow nga t-shirt, color gray nga cargo pants ug color blue nga tsinelas.
Napalgan ang biktima sa mga tanod nga nagbuy-od ug naligo sa dugo sa ngit-ngit nga bahin sa nahisgutang lugar ug dali kining gidala ngadto sa Talisay City District Hospital apan patay na kining nahiabot sa maong tambalanan.
Si PO3 Edwin Alvarado nga nahinabi sa Banat News nagkanayon nga usa sa ilang gituohan nga posibleng asset sa kapolisan ang biktima, apan wala usab nila isalikway ang katahap nga adunay kalambigitan ang ginadiling drugas sa maong hitabo.
Ang patay’ng lawas sa biktima nahimutang karon sa Cebu Memorial Funeral Homes sa barangay Linao, Talisay.
Hangtud sa oras sa pagsuwat niining balita wala pay paryente nga mikuha sa patay’ng lawas sa biktima.
Ang kapolisan sa Talisay mipahigayon og follow-up nga imbestigasyon sa maong insidente. - Brenda D. Batuto (BANATNEWS)