CEBU, Philippines - Usa ka suspetsado sa pagpangawat og mga puthaw sa compound sa National Power Corp. sa dakbayan sa Naga gipusil angol sa iyang kauban didto sa barangay Talavera, dakbayan sa Toledo sa miaging gabii.
Si Chief Inspector Jovito Canlapan , hepe sa Toledo City Police Station miila sa biktima nga si Alegones Provida, 28, nga taga Talavera, samtang ang mga suspetsado nailhan nga sila Jerry Candol, 29, Ryan Andan, 28, Darwin Razula, ug Johnrey De Gracia nga pulos silingan sa biktima.
Sa imbistigasyon nga gihimo nasayran gikan kang Canlapan nga daan nang nagkabangi ang biktima ug ang mga suspetsado gumikan sa dili maayong pagkabahin nila ang kuwarta nga halin sa mga puthaw nga ilang kinawat gikan sa NPC sa miaging tuig.
Sa gihimong hot pursuit operation sa kapolisan, duha ra ang nadakpan sa mga suspetsado nga mao sila si Candol ug Andan, samtang si Razula ug De Gracia nagpabiling gawasnon.
Sa wala pa pusila ang biktima, nakig-inom pa kini sa iyang manghod nga si German ug mga amigo sa usa ka tindahan sa Talavera. Apan milakaw makadiyot ang biktima kay magpalit pa og dugang ilimnon, dihang kalit lang kining gipusil sa mga suspetsado.
Ang biktima daling gihatod sa tambalanan sa dakbayan sa Sugbo gumikan sa katalandugon sa kahimtang niini.
Matud pa ni Canlapan nga segun sa pamahayag ni Candol, ang responsabli kuno sa pagpusil sa biktima mao si Razula. Padayon pang gipangita sa kapolisan ang laing duha ka mga suspetsado. (BANATNEWS)