Papa naghikog kay anak hagbong sa pasulit

CEBU, Philippines - Patay ang usa ka amahan kinsa giingong naghikog tungod sa kaguol nga wala makapasar ang anak sa pasulit samtang nalandig sa tambalanan ang usa ka katabang nga misuway og hikog sa duha ka managlahing lugar sa habagatan niadtong Sabado sa buntag ug gabii.

Sa barangay Balirong sa Naga, nagbitay ug patay na nga naabtan sa mga paryente sulod sa pansayan ang 56-anyos nga amahan (pangalan gipugngan sa Banat News) residente sa maong dapit.

Si PO2 Miguel Castañarez, duty desk officer sa kapolisan sa pakighinabi sa Banat News miingon nga adunay pisi sa iyang liog ang maong amahan nga ang pikas tumoy gihikot sa babag nga kahoy diha sa ibabaw’ng bahin sa pansayan.

Matud ni Castañarez nga nagtuo ang mga kabanay nga naguol kini tungod kay wala makapasar sa seaman’s examination ang iyang anak. Ug nadungagan ang problema sanglit giingong nalisoan usab og pangisip ang maong anak ug nadala sa usa ka tambalan sa Sugbu.

Sa laing hitabo, usa ka 20-anyos nga katabang ang naangol human kini nag-unay og laslas sa duha niya ka pulso gamit ang duha ka kutsilyo niadtong Sabado sa gabii diha sa balay sa iyang agalon sa Springwoods Subdivision, barangay Tulay, lungsod sa Minglanilla.

Ang dalaga nga taga barangay Casoy, dakbayan sa Toledo daling gidala ngadto sa Minglanilla District Hospital ug luwas na ang kahimtang human matud pa ni PO1 Raymund Romarez nabantayan kini nga naglaslas sa iyang kaugalingon.

Na-recover sa mga polis nga miresponde gikan sa lugar nga nahitaboan ang duha ka kutsilyo nga dunay gitas-ong walo ka pulgada matag usa niini. (BANATNEWS)