CEBU, Philippines - Supak si Provincial board member Agnes Magpale, chairperson sa committee on tourism sa hunta probinsiyal sa sugyot nga ang hulagway ni Pambansang Kamao Manny Pacquiao nga ibutang sa promotion material sa Department of Tourism. (DOT) Kini aron ma-promote ang mga tourist destination sa nasud sa Pilipinas.Matud pa ni Magpale nga dili haum nga ang dagway ni Pacquiao iapil sa pagbutang sa logo o bisan unsang campaign material sa DOT sanglit sama ra og ang gi-promote mao si Pacquiao na mismo.Sigun pa ni Magpale nga si Pacquiao dili na angayan nga i-promote pa tungod kay sikat na kaayo ang Filipinong boksidor.
Nagtuo ang bokal nga dili makadani og turista ang pagbutang og dagway ni Pacquiao bisan pa og sikat na kaayo kini sa tibuok kalibotan.Iyang gipasabot nga ang makapaikag sa mga langyaw nga mga turista nga mosuroysuroy sa mga tourist spot dinhi sa nasud sa Piipinas mao ang hulagway sa usa ka anindot sa lugar.Hinuon giklaro ni Magpale nga wala siyay kaligutgot kang Pacquiao hinungdan sa iyang pagsupak sa nahisgutang sugyot gani iya pang gipahalipayan si Pacquiao sa iyang dakong kadaugan sa away niini batok kang Antonio Margarito niadtong milabay nga Domingo didto sa Arlington Texas.Apan nagtuo siya nga ang kasikat ni Pacquiao dili paigo sa pagdani sa mga turista nga mobisita dinhi sa nasud. (BANAT NEWS)