CEBU, Philippines - Usa ka 26-anyos nga lalaki ang nadakpan human kini misuway og kawat sa mga helmet nga gisablay sa manobela sa usa ka motorsiklo nga giparking didto sa Asia Town I.T Park, sa Brgy. Apas, ning dakbayan sa Sugbo sa miaging kaadlawon.
Ang suspetsado giila nga si Raymond Caburnay, ulitawo, nga taga Sitio Capaculan, Brgy. Tisa niining dakbayan.
Siya maoy gitumbok nga misakiyo sa duha ka helmet nga gipanag-iya ni Carl Ebo, 25, ulitawo, nga taga A. Lopez Street sa Brgy. Calamba ning dakbayan.
Matud pa sa biktima nga samtang iyang gi-parking ang iyang motorsiklo sa daplin sa dalan ug misulod siya sa Jollibee, wala siya magdahom nga ang suspetsado nagmaneho usab diay og tangtang sa duha ka helmet nga iyang gisablay sa manobela sa iyahang XRM nga motor.
Maayo gani kay gipahibawo siya sa duha ka security guard nga si Arnold Monarca ug Abner Llopo.
Ang duha ka guwardiya kinsa ubos sa Cherubin Security Agency maoy midali pagsikop sa suspetsado ug gitunol usab nila kini ngadto sa kapolisan.
Sa pagkakaron nagtingkagol na sa prisohan ang suspetsado ug giandam na usab ang kasong pagpangawat nga ipasaka sa biktima ngadto kaniya. (BANAT NEWS)