Tulo patay sa crossfire sa engkuwentro sa 19th IB vs. NPA sa Leyte
ORMOC CITY, Philippines — Duha ka mga sakop sa Energy Development Corporation (EDC) ug usa ka mag-uuma ang napatay human maigo sa crossfire sa engkwentro tali sa mga sakop sa 19th Infantry Battalion ug mga gidudahang rebeldeng New Peoples Army sa barangay Lim-ao sa lungsod sa Kananga niadtong Nobiyembre 15 (Lunes).
Sa gipagawas nga opisyal nga pamahayag sa EDC-Leyte Geothermal Production Field kagahapon miila sa mga namatay mao sila si Professor Leonardo Co ang team leader ug consultant, Sofronio Cortez, forest guard sa EDC-Environment Management Department ug usa ka Julius Borromeo nga sakop sa Tongonan Farmers Association nga usa sa mga gitabangan sa EDC. Si EDC-LGPF resident manager, Engr. Manuel Paete nagkanayon nga nakaangkon og mga samad pinusilan ang mga biktima. Ang tulo kabahin sa five-man team sa mga biodiversity experts nga miadto sa EDC Well 403 sa kabukiran sa Kananga aron mangolekta og endangered nga matang sa tanom.
Samtang ang duha naka-survive giilang sila si Ronino Gibe, usa ka contractual nga forester sa EDC ug Policarpio Balute nga maoy guide. Ang duha nakadagan gikan sa engkwentro.
Si Lt. Col. Federico Tutaan sa 19th IB mokumpirmar sa maong engkwentro batok sa gihulagway niyang “enemy.”
“Actually, we have already our mission’s objective in another area, but decided to visit EDC’s Well 403 because of strong intelligence reagarding the presence of a 30-armed man communist-terrorists group inside the EDC complex,” matud pa ni Tutaan.
Matud pa niini nga adunay koordinasyon ang EDC ug militar, ug diha sila moagi sa EDC Well 403 apan kalit silang gipaulanan og bala sa gibana-banang napulo ka NPA nga gipanguluhan nila “Matus” ug “Tibor” hinungdan sa sinukliay sa bala.
Si Tutaan nagkanayon nga wala sila makasigurong kinsay nakaigo sa mga biktima sanglit aduna say posibilidad nga ang mga rebelde maoy mihimo niini. – BANAT NEWS
- Latest
- Trending
