CEBU, Philippines - Gidakop sa kapulisan sa rehiyon siyete ang usa ka propesor didto sa Dipolog City gumikan sa upat ka warrant of arrest sa kasong illegal recruitment ug usa niini estafa.
Human sa flag raising ceremony diha sa PRO-7 sa Camp Sergio Osmeña Sr. kagahapon sa buntag gi-presentar ni PRO-7 Chief Supt. Ager Ontog Jr. ang suspetsado nga si Samuel De Guzman Mavida Jr. 49, nga giingong usa ka magtutudlo sa usa ka kolehiyo sa Dipolog City.
Matud pa ni Ontog ang mga operatiba sa Regional Intelligence Division (RID)-7 gipangulohan ni Sr. Supt. Augusto Marquez misikop sa suspetsado niadtong Biyernes subay sa warrant of arrest nga giisyu ni Judge Generosa Labra, (No bail bond recommended), Judge Gilbert Moises (no bail bond recommended), ikatulo kang Judge Bienvenido Saniel Jr., nga dunay gitugot nga piyansang P24 mil ug ang ikaupat mao ang estafa nga giisyu ni Judge Gilbert Moises nga dunay piyansang P60 mil.
Si Sr. Supt. Marquez mitug-an sa mga tigbalita nga niadtong Biyernes mianha sa iyang buhatan si retired major Ruben de Guzman nga nagdala og kopya sa warrant ug nagpatabang nga madakpan ang suspek human nahibaw-an nga tua kini sa Dipolog City.
Matud pang Marquez nga pag-umangkon ni Ruben ang tulo sa mga biktima ni Mavida nga gisaarang patrabahuon sa San Francisco, California sa Estados Unidos isip usa ka Special Education (SPED) teacher.
Giingong nakabayad na sila og dul-an sa tunga sa milyon ka pesos aron lang makalarga didto sa gawas sa nasud apan wala gyud kini mahitabo.
Matud ni Marquez nga hugot nga gihimakak sa suspek ang pasangil ug nangangkon nga biktima lang siya sa duha ka Amerkanong misugo kaniya pag-recruit. (BANATNEWS)