CEBU, Philippines - Mikabat sa 18 ka balay ang naugdaw sa sunog nga miigo sa sitio Anakma sa barangay Pagsabungan, dakbayan sa Mandaue kagahapon sa alas 7:20 sa buntag.
Si SFO1 Dennis Lua, imbestigador sa kabomberohan sa maong dakbayan nga nahinabi sa Banat News miingon nga nagsugod ang kayo sa panimalay ni Renerio Rivera.
Matud pa niya nga si Mandaue City Fire Marshall Rogilio Bongabong mideklarar sa maong sunog nga second alarm diin nakontrolar nila ang kayo sulod sa 10 minutos.
Si SFO1 Lua miingon nga nagsugod ang kayo sa kisame sa balay ni Rivera ug midukot kini sa kortina nga daling miugdaw sa kinatibuk-ang balay hangtod nga nakatapon kini sa ubang mga kasikbit nga mga panimalay.
Gumikan kay ginama sa gaan nga sangkap, daling naugdaw ang 18 ka panimalay sa maong lugar, matud pa ni Lua.
Samtang ang mga opisyal sa maong barangay nga gipangulohan ni barangay kapitan Andres Suson maoy miayuda dayon sa mga biktima pinaagi sa paghatag og pagkaon ug pagbutang kanila didto sa covered court sa ilang barangay.
Si Jocelyn Domingo sa City Social Welfare office sa Mandaue mibutyag usab sa Banat News nga balig tulo ka adlaw ang giandam nilang pagkaon sa mga biktima.
Sa pagsulat ning balita wala pa makahatag og banabana ang mga kabomberohan sa tukmang kantidad sa mga naugdaw nga kabtangan.
Hinuon walay gikatahong kinabuhi nga naangin sa maong sunog .
Sa miaging Huwebes , 25 usab ka balay ang naugdaw sa sunog didto sa sitio Bildohan, barangay Looc sa mao gihapong dakbayan. (BANAT NEWS)