Wanted sa Tabogon nadakpan sa Lapulapu

CEBU, Philippines - Usa ka gipangita sa kapolisan sa lungsod sa Tabogon gumikan sa kasong double murder nadakpan sa kapolisan sa dakbayan sa Lapulapu sa miaging gabii.

Ang nadakpan mao si Ramil Caballero, 26 , nga taga Tagba-o sa nahisgotang lungsod kinsa suspetsado sa kamatayon sa duha ka tawo niadtong naghinapos nga mga adlaw sa bulan sa Disyembre sa miaging tuig.

Si Inspector Jacinto Mandal sa kapolisan sa dakbayan sa Lapulapu maoy nakasikop ni Caballero sa gipuy-an niining balay pinaagi sa   warrant of arrest nga giluwatan sa korte.

Si PO3 Jesus Suan, imbestigador sa kapolisan sa lungsod sa Tabogon nga nahinabi sa Banat News miingon nga si Caballero gipasakaan nila og double murder nga kaso human kini makatigbas patay sa duha ka mga tawo sa ilang lungsod.

Matud pa ni PO3 Suan nga dali kaayong nakasibat si Caballero human sa maong hitabo.

Dugang pa niya nga ang warrant of arrest giluwatan ni Judge Antonio Maringumen sa Branch 51 Regional Trial Court (RTC) 7 sa dakbayan sa Danao.  – BANAT NEWS

Show comments