City hall dako'g utang sa caterer

CEBU, Philippines - Adunay dakung utang nga wala pa mabayri ang kagamhanan sa siyudad sa Sugbo nga gibana-banang mokabat na og P10 milyones ngadto sa mga food caterer nga gikontrata sa siyudad pag-supply og mga pack lunch alang sa mga pamilya nga makasugat og trahedya sama sa sunog ug uban.

Kini maoy hinungdan nga daling gimandoan ni Mayor Michael Rama si City Administrator Jose Marie Poblete sa pagsusi niini aron mapadali ang pag-asikaso sa bayad ug tangtangon sa katungdanan kadtong mahibaw-an nga responsabli sa paglangay- langay niini.

Si Rama mipadayag sa kabalaka nga basin og magdumili na unya pag-supply og mga pagkaon ang maong mga supplier sa mga pamilyang mabiktima sa mga trahedya sa mosunod nga mga adlaw.

Si kanhi konsehal Gerry Carillo ang chairman sa Cebu City Disaster on Preparedness sa siyudad mibutyag sa Banat News nga mao kini ang ilang gituki kauban sa personnel sa Accounting office, City Treasurers office, Department of Social Welfare and Services (DSWS) niadtong miaging adlaw.

Matud ni Carillo nga ang maong utang ngadto sa 4 ka mga caterer nagsugod pa niadtong bulan sa Enero ning tuiga hangtud karun nga wala pa maasikaso og bayad sa siyudad bisan og nagsapaw sapaw na kini tungod sa daghan nang mga nahitabong sunog dinhi sa dakbayan ug ubang trahedya karung tuiga. Gitug-an ni Carillo nga iya usab nga namatikdan nga gikan sa tag P50 ngadto sa P60 matag pack lunch kaniadto dihang siya pa ang chairman sa committee on social services sa konseho, apan gipatas-an kini karong panahona sa mga caterer ngadto sa tag P80 tungod sa kadugay bayran sa siyudad busa misamot na kadako ang utang karon sa siyudad.

Ang higpit kaayo nga pre-audit nga gipatumang lagda sa Commission on Audit (COA) maoy usa sa gitumbok sa konsehal nga hinungdan nga nakalangay og release sa bayad ngadto sa mga caterer kinsa wala lang ibutyag sa kanhi konsehal ang mga ngalan.  – BANAT NEWS