CEBU, Philippines - Usa ka menor de edad ang gipahimuslan sa duha ka batan-ong lalaki pasado ala-una sa kaadlawon sa Villa Roca, barangay Poblacion Occidental lungsod sa Consolacion.
Kini human ang 17-anyos nga biktima ug kaubang lalaki gitulis sa mga suspek nga sila si Jason Estopa Omaña, 24 ug laing 16-anyos nga lalaki nga pulos molupyo sa barangay Cansaga sa maong lungsod.
Base sa imbestigasyon sa kapolisan sa lungsod sa Consolacion nasayran nga ang biktima uban sa iyang higala (pangalan gipugngan sa Banat News) padulong sa panimalay sa hinigugma sa biktima.
Apan sa dihang naabot sila sa maong lugar kalit lang silang gitagbo sa mga suspek ug gitionan sila og kutsilyo dayong pangayo sa ilang kwarta.
Tungod sa kahadlok nag- duha-duha sa paghatag sa iyang kwarta nga dala nga nagkantidad og P120. Ang biktima mitug-an nga ang 16-anyos maoy mibahad nga sila patyon kun mosinggit.
Ug kalit lang gipangtaptapan sa duha ang mga mata sa biktima ug gisugdan og lugos. Human niini gibiyaan sa mga tulisan ang biktima hinungdan nga nakahigayon kini sa pagsumbong sa mga polis.
Atol sa gihimong hot pursuit operation nadakpan sa kapolisan ang mga suspek kinsa positibong gitudlo sa biktima nga maoy mitulis ug milugos kaniya.
Sa pakighinabi sa Banat News ni PO1 Adonis Teraña mibutyag kini nga sa iyang pakighinabi sa mga suspetsado mihimakak ang duha sa pasangil tungod kay natulog na sila nianang tungura.
Matud pa sa duha ka suspetsado nga pasado alas-7 hangtod alas-11 sa gabii nagkalingaw lang sila og tan-aw og mahjong dapit sa ilang panimalay ug nanguli sila pasado alas-12 na hinungdan nga wala gayud silay kasayuran sa maong panghitabo. Apan bisan paman og mihimakak ang duha ka suspetsado ang kapolisan nagpaabot lang sa bitkima nga mopasaka og kaso batok kanila. (BANATNEWS)