CEBU, Philippines - Mipatim-aw sa buhatan sa Theft and Robbery Section (TRS) ang tulo sa upat ka suspetsado sa pagtulis ug paglugos sa 28-anyos nga dalaga sa ibabaw sa skywalk sa dalan M. L. Quezon, barangay Pusok, dakbayan sa Lapulapu.
Ang tulo mitahan kang Insp. William Humoc, hepe sa TRS sa Lapulapu City Police Office (LLPO) alas-10 pasado ang takna kagahapon sa buntag nga mao sila si Jardin Rex, alyas Alok Canales, 19, Ryan Ramirez, 19 ug Junel Oyao Abendan alyas Yeye nga pulos sakop sa Crips gang ug molupyo sa barangay Pusok sa maong dakbayan. Ang tulo nga mitahan human mogawas ang taho nga gilambigit sila ni Christopher Antig kinsa una nang nadakpan, nga sila maoy kauban paghimo sa maong krimen.
Ang tulo buot nga limpyohan ang ilang pangalan sanglit ilang gipanghimakak ang pasangil kanila.
Apan ang tulo giingong positibong giila ni Antig ug sa mismong biktima hinungdan sa pagpasaka sa kasong robbery with rape niadto pang Miyerkules.
Ang tulo gipresentar sa kapolisan kagahapon sa korte ug pagkahuman gibalhog na sila sa bilanggoan sa kapolisan sa maong dakbayan.
Si Sr. Supt. Mariano Natuel Jr. dihang nahinabi sa Banat News miingon nga ang tulo notadong badlungon sa maong dapit ug aduna nay mga kasong gikalambigitan sama sa pagpanulis. – BANAT NEWS