Nag-strike sa Veco andam nga maminaw sa negosasyon

CEBU, Philippines - Andam ang mga sakop sa Union of the Visayan Electric Company (VECO) nga moatubang ug paminawon ang bisan unsang sugyot nga settlement o negosasyon gikan sa habig sa tagdumala sa maong kompanya.

Ang pangulo sa Visayan Electric Company Employees Union - Associated Labor Unions-Trade Union Congress of the Philippines (VECEU-ALU-TUCP) nga si Casimero Mahilum miingon nga 156 sa 239 ka mga sakop sa ilang union ang mibotar pabor sa strike tungod kay wala sila makauyon sa pamaagi sa kompanya.

Ang resulta sa gihimo nila nga botasyon sa paghimo’g strike giduso na ngadto sa National Conciliation and Mediation Board (NCMB) kagahapon sa buntag.

Human sa pagduso sa resulta sa botasyon, aduna sila’y pito ka adlaw nga “cooling-off period” alang sa marathon hearing sa dili pa nila himuon ang aktwal nga strike. “Andam gyud mi makig-settle, sa naa ra gyud nila ang nag-agad ang among desisyon kung mag-strike ba mi o dili. Bisan unsa nga negosasyon andam gyud mi moatubang,” dugang pa ni Mahilum.

Dugang pa niya nga dunay unom karon ka opisyales sa union ang nameligro usab nga taktakon sa kompanya ug mao kini ang usa sa ilang gibantayan.

Samtang ang tigpamaba sa Veco nga si Ethel Natera nagkanayon nga dili angay mabalaka ang mga konsumidor gumikan kay dili maapektahan ang operasyon sa Veco.  – BANAT NEWS