CEBU, Philippines - Usa ka lalaki ang gipusil patay pasado alas-5 sa milabay’ng hapon diha sa sitio Moryo-moryo barangay Tina-an sa Naga ug usa sa mga suspek usa ka bata.
Ang biktima nailhan nga si Victor Franco, 31, molupyo sa maong lugar samtang ang suspetsado gitumbok nga mao ang manag-amahang sila Edgardo Jumao-as, 50, ug ang anak niini nga nagpangidaron og 16-anyos.
Sa pakighinabi sa Banat News ni PO3 Francisco Codiñera, usa sa mga mi-alarma sa maong insidente misaysay nga sa wala pa mahitabo ang pagpamusil nag-inom ang biktima ug ang suspek.
Matud pa ni Codiñera nga sa diha nga nahubog na ang biktima kalit lang kini nga gipusil sa 16-anyos nga anak ni Jumao-as diha sa ulo ug patay na pag-abot sa Minglanilla District Hospital.
Midugang si Codiñera nga ang biktima ug ang suspetsado dugay nang adunay wala pagkasinabtanay tungod lang sa ilegal nga sugal.
Padayun pa karun nga nangita ang kapolisan sa mag-amahan human kini dali usab nga nakasibat human sa panghitabo. – BANAT NEWS