CEBU, Philippines - Gibana-banang mokabat sa P80 mil ang danyos sa nasunog nga usa ka classroom sa North City Central School sa barangay Luray-II, siyudad sa Toledo kagahapon sa alas 4:50 sa kaadlawon.
Si SFO1 Julius Dagatan, fire investigator sa Toledo Fire Department mibutyag sa Banat News nga ang nasunog mao ang nagbinugtong nga classroom sa grade-4 apan wala kini makakaylap sa sikbit nga mga classroom kay nasumpo dayon ang kayo pipila ka minutos human sa pag-responde sa mga bombero.
Gipaubos lang sa 1st alarm ang maong sunog nga miugdaw gyud sa classroom nga ginama sa kahoy ang katunga nga bahin, samtang sementado usab ang laing katunga niini.
Apil sa nasunog mao ang mga lingkoranan sa mga tinun-an, mga libro ug uban pang kagamitan sa maestro ug mga tinun-an.
Matud ni SFO1 Dagatan padayon pa ang ilang imbistigasyon sa paghimo ning balita ug sa pagtino sa hinungdan sa maong sunog .
Wala isalikway sa kabomberohan ang anggulo nga gituyo pagdaob ang maong lawak saringan.
Kini human madawat nila ang report nga matud pa walay guwardiya ang maong tulunghaan ug ang mga tawo magsulod gawas lang sa maong lawak.
Sa milabay’ng semana matud ni SFO1 Dagatan nga nabiktima usab sa pagpanglungkab ang sikbit nga lawak sa mao gihapong tunghaan. (BANATNEWS)