Giduslak sa liog tipi

CEBU, Philippines - Patay ang usa ka tigulang human giunay og dunggab sa iyang suod nga higala pasado alas-12 sa tungang gabii sa barangay Cansalonoy lungsod sa Ronda.

Ang biktima nailhan nga si Eugenio Camallere Bajenting, 70, molupyo sa maong lugar samtang ang suspetsado nailhan usab nga si Roberto Villaveto Birrondo, 62.

Base sa imbestigasyon sa kapolisan sa lungsod sa Ronda nasayran nga ang suspetsado natulog sa sala nga bahin sa panimalay sa biktima samtang ang naulahi diha matulog sa kusina.

Apan nianang pagkatungang-gabii nakamata ang biktima tungod sa nadunggan nga kasikas sa iyang panimalay hinungdan nga iya kini nga gisusi.

Sa kalit lang ug walay igong hinungdan gidunggab kini sa suspetsado ginamit ang usa ka lampas ug naigo sa iyang li-og. Ang biktima daling gidala sa Barili District Hospital apan patay na kini.

Samtang sa pakighinabi sa Banat News ni PO3 Emerito Sansan kini mibutyag nga base sa gibuhiang pamahayag sa suspetsado wala kini makaila kun si kinsa ang iyang gidunggab ug uwahi na niyang nahibaw-an nga ang suod niya kining higala. (BANAT)