CEBU, Philippines - Higpit nga gibantayan sa kapolisan sa dakbayan sa Lapulapu ang mga ballot boxes nga giapod-apod na sa Commission on Election (Comelec) ngadto sa mga sakop sa Board of Election Inspectors (BEI) alang sa barangay election karong adlawa.
Si Senior Superintendent Mariano Natuel mibutyag nga adunay tag-upat ka polis nga iyang gipabantay sa matag eskuylahan nga may sentrong botahanan uban usab sa mga sakop sa Philippine Air Force, (PAF) ug Philippine Navy (PN).
Dugang pa niya nga bisan ang mga vital installation sa dakbayan nga naglakip sa Mactan Mandaue Bridge, Marcelo Fernan Bridge, oil depot ug uban pa, higpit usab nilang gibantayan agi og panagana pamasin nga may dautang pundok nga mosuway sa pagmugna og kasamok sa piniliay karong adlawa.
Matud pa ni Natuel nga adunay mga reserve ug reaction team nga andam nga motubag sa higayon nga adunay alarma nga mahitabo hangtod na sa gabii sa panahon sa proklamasyon sa mga mananaog.
Gitataw niya nga ang isla sa Olango nga gilangkoban sa 11 ka barangay nga naglakip sa barangay Caubyan ug isla sa Pangan-an gidestinohan niya og Sea borne patrol ug tulo ka mga bangka nga maoy daling motadlas sa kadagatan sa pagtubag kun may kagubot nga mahitabo ning adlawa.
Hinuon si Natuel miingon nga sa mga miaging piniliay niadtong Mayo 10, ning tuiga, walay gikataho sa dakbayan nga nahitabong kagubot ug busa gilauman niya nga niining higayona malinawon usab ang katibuk-ang dakbayan sa Lapulapu. (BANATNEWS)