Porno DVDs, CDs gisakmit sa CAIB

CEBU, Philippines - Nasurpresa ang pipila ka mga mamaligyaay og malaw-ay nga DVD human gironda ang ilang mga baligya sa mga sakop sa Cebu City Anti-Indecency Board nga gipangulohan ni Dr.Lucelle Mercado uban usab sa mga sakop sa Cebu City Police Office.

Ang operasyon gidungan og lusad aron masigurong dili makabantay ang ubang mamaligyaay og mga malaw-ay nga mga palabas hinungdan nga daghang mga tindahan ang wala makabantay sa ilang pag-abot.

Nakasakmit sila gahapon og 3,250 ka mga kopya sa mga pornographic films gikan sa nagkadaiyang tindahan diha sa dalan Colon.

Sa miaging semana, ang CAIB nakasakmit gihapon og 3,481 ka kopya sa malaw-ay’ng mga DVD films ug gikatakdang paligsan sa pison karong adlawa atubangan sa City Hall.

Atol sa pagpangronda, pipila sa mga tindahan ang nagdali-dali og panirado apan ang uban napugngan gyud sa kapulisan ug nadiskubrehan ang kinarton nga mga kopya sa pornographic DVDs.

Dugang pa ni Mercado nga dili nila hunongan ang mga surpresang mga operasyon aron hingpit nga mahunong ang padayong pagkatap sa mga kopya sa sex videos ug sanglit lakip sa mga gipangbaligyaan niini mga menor de edad. – BANAT NEWS