CEBU, Philippines - Nagplano ang Cebu City Market Administrator nga gipangulohan ni Racquel Arce nga moduso og resolusyon aron maayo ang atop sa Pasil Fish Market gumikan kay naguba na kini hinungdan nga maapektohan ang pagpaninda sa mga fish vendors sa panahon nga mobunok ang uwan.
Samtang si Mayor Michael Rama mihangop sa maong katuyoan aron dili na mag-antos ang mga fish vendors ug andam siya magpaabot sa resulosyon aron iya kini nga matun-an.
Kahinumduman nga taud-taod na nga mihangyo ang presidente sa Pasil Fish Vendors Multi-Purpose Cooperative nga si Abadita Maranga ngadto sa City Market Authority nga ipaayo ang atop sa merkado.
Nasayran sa Banat News nga dili makatarong og paninda ang mga vendors kung uwan ug dako usab kini og epekto sa ilang kita. Giingong mawad-an og gana ang mga tawo nga mosulod sa maong dapit panahon sa ting-ulan gumikan kay gubaon na ang atop niini.
Panghinaot ni Maranga nga matagaan kini og pagtagad sa siyudad ug magahinan og saktong pundo alang sa maong katuyoan.
Samtang nagplano ang mayor nga palamboon niya og maayo ang gitawag niya og “bay walk” sa shoreline sa Pasil, Suba ug Sawang Calero gumikan kay makahatag kini og atraksiyon. – BANAT NEWS