Giilogan sa giduwaang pistola napusilan sa baba

CEBU, Philippines - Namatay ang usa ka negosyante human kini maigo sa baba sa kalibre 9mm nga pistola nga giingong iyahang giduwaan apan kalit nga mibuto ang armas dihang buot untang ilugon sa iyang mga higala.

Kini nahitabo alas-6 pasado ang takna sa hapon   niadtong miaging Sabado sa Vaño Beach Resort sa barangay Marigondon, dakbayan sa Lapulapu.

Ang namatay mao si Gian Marie Estose, 37, nga taga sitio Opra, sa barangay Kalunasan ning dakbayan samtang giimbestigar ang mga higala niining sila si Jonathan Jabal Alonte, 24, ug Leodegario Pogoy, nga taga Lorega, dakbayan sa Sugbo.

Si PO3 James Ariel Funtes ug PO1 Eric Jacalan sa Investigation and Detective Management Branch (IDMB) sa Mandaue City Police Office (MCPO) miingon nga padulong na nga mamauli ang biktima ug ang duha gikan sa pagpangaligo sa maong dapit niadtong tungora.

Apan sa dayon na nilang panglakaw gikatahong gikuha ni Estose ang dala niining armas ug gipatuyoktuyok kini sa iyang tudlo hinungdan sa kakugang sa iyang mga higala.

Matud pa nga pulos na sila nakainom niadtong tungura hinungdan nga gisuwayan og ilog sa duha ang armas gikan kang Estose apan ang naulahi gikatahong nagmagahi.

Sa tanto nilang nilayugay kalit nga mibuto ang armas ug adto natunong sa baba ni Estose, ang duha daling miaswat kaniya ug midala niini ngadto sa Mactan Doctors Hospital sa barangay Basak apan gideklarar kini sa mga doktor nga dead on arrival.

Human sa hitabo ang duha gidala sa kapolisan ngadto sa ilang buhatan alang sa imbestigasyon. (BANATNEWS)