CEBU, Philippines - Patay na nga naabtan sa mga polis ang usa sa mga inilang tulisan sa dakbayan sa Talisay human kini tabangi og dunggab sa duha niya ka giingong kaubang mga tulisan didto sa sitio Mananga 2, sa maong dakbayan niadtong Biyernes sa kaadlawon atol sa piyesta sa Talisay.
Ang biktima mao si Richard Sarip, usa ka Muslim nga taga Mananga samtang ang mga suspetsado nailhan usab nga sila si Ferdinand Santos Alyas “Nanan” ,ug Oliver Honor, pulos hingkod , ug mga silingan ra sa biktima.
Sila si PO2 Leandro Azarcon ug PO2 Stephen Sefuesca kinsa maoy miresponde sa alarma mibutyag sa Banat News kagahapon nga ang biktima ug mga suspetsado kinsa magkabarkada nailang pulos mga tulisan sa ilang lugar.
Ang biktima ug ang mga suspetsado giingong pulos manglabnihay sa barangay Tabunok nga kasagaran nilang biktimahon mga pasahero sa PUJ.
Sumala sa mga kapolisan nga si Sarip nagtan-aw og hantak dihang kalit lang kining gipanunggab nila ni Santos ug Honor.
Matud ni Azarcon nga pag-abot nila sa maong lugar gitabunan na og habol ang lawas ni Sarip kansang liog may duha ka dinunggaban ug duha usab sa buko-buko.
Gipangita pa sa kapolisan ang mga suspetsado kinsa misibat dayon human sa hitabo. (BANAT NEWS)