Oaminal molektura sa mga polis

CEBU, Philippines - Mopahigayon og lektura sa kapolisan sa tibuok nasud si kanhi Dangerous Drugs Board (DDB) Undersecretary Paul Clarence Oaminal aron pagpalig-on sa kasinatian sa kapolisan bahin sa anti drug operation. Si Oaminal nakahukom paglusad niini human niya nasuta nga nagkinahanglang maedukar pag-ayo ang kapolisan aron malikay sila sa mga bulilyaso nga operasyon batok drugas.

Gawas niini tuyo usab ni Oaminal nga matarong ang imbistigasiyon sa mga kasong ipasaka ngadto sa korte ug dili kay sayon-sayonon lang sa pagbasura sa mga piskal.

Gipasabot ni Oaminal nga iyang lakang gitumong aron katabangan niya ang bag-ong natudlong hepe sa kapolisan nga si PNP chief Raul Bacalzo nga usa usab ka abogado ug kauban niya kaniadto diha sa DDB.

Ang maong lecture alang sa kapolisan gitumong usab aron ang kapolisan labing mosanding sa ilang mga kalihokan sa pagpakigbatok sa ginadiling drugas diha sa bag-o niyang ilusad nga basahon nga mao ang Criminal Law-II.

Kining maong libro maoy motudlo ug mogiya sa kapolisan sa tukmang mga paagi sa ilusad nilang kalihokan batok sa illegal nga drugas gikan sa pag-imbistigar ngadto na sa pagsang-at sa kaso sa korte batok sa mga dinakpan.

Kini mao nay ikasiyam nga libro kabahin sa Criminal Law nga sinuwat ni Oaminal nga naglatid sa mga lagda kabahin sa mga operasyon batok sa gidiling drugas.

Gikasubo ni Oaminal ang mga panghitabo nga daghan ang mga kaso nga naglambigit sa gidiling drugas nga mabasura lang sa hukmanan tungod sa teknikalidad o gagmay’ng sipyat sa kapolisan nga mipahigayon og kalihokan batok sa gidiling drugas.

Nasayran nga si Oaminal napasidunggan na usab sa Philippine National Training Institute isip outstanding instructor gikan sa pribadong sector niadtong tuig 2001.  – BANAT NEWS