4 barangay sa Bogo ug Daanbantayan monitoron sa PNP ug Comelec

CEBU, Philippines - Upat ka mga barangay gikan sa Bogo ug sa lungsod sa Daanbantayan ang gitutukan sa kapolisan tungod sa posibilidad nga motumaw ang kagubot susama sa nahitabo niadtong Mayo 10 nga eleksyon.

Ang mga gipanid-ang barangay sa Bogo mao ang barangay Malingin, Banban ug Cayang samtang sa lungsod sa Daanbantayan mao ang barangay Baterya.

Matud pa ni Sr. Supt. Erson Digal, hepe sa kapolisan sa lalawigan sa Sugbo nga kining maong mga dapita aduna nay mga kasaysayan sa kagubot.

Samtang pipila sa mga mokandidato mga inilang tawo ug may nagkadaiyang suporter.

Midugang si Digal nga ang mga kandidto sa maong barangay nagkauyon hinuon nga mopahigayon og peace covenant karung Sabado nga pagatambongan usab sa representante sa Simbahan, Comelec ug PNP.

Karong adlaw nga Lunes ipinalisar sa himuong tigom nga tambungan sa PNP, 78th Infantry Battalion ug ni Comelec Provincial Supervisor Lionel Marco Castillano ang seguridad sa mga dapit sa lalawigan.  – BANAT NEWS