CEBU, Philippines - Usa ka lalaki nga nagpailang empleyado sa Public Attorneys Office (PAO) nagmaoy tungod sa grabeng kahubog ug nanukmag pa sa pulis nga miresponde sa maong alarma kagahapon sa kaadlawon diha sa sitio Lubi sa barangay Capitol Site ning siyudad.
Natanggong sa detention cell sa Fuente Police station si Randy Miñoza nagpuyo sa nahisgutang lugar human gidakop sa kapulisan tungod sa reklamo sa usa ka residente tungod sa grabeng pagmaoy sa suspek.
Ang maong ginang mitug-an nga iyahang gibadlong si Miñoza gumikan sa kabanha bisan lawom na ang kagabhion apan inay mohunong gilabay na hinuon og baso ang balay sa reklamante.
Ang reklamante mitug-an sa kapolisan nga dili lang kini maoy labing unang higayon nga nagmaoy ang suspek sanglit naandan na niini ang magmaoy matag mahubog kini.
Apan pag-abot sa Fuente Police station gikalitan og sukmag sa suspek ang baba ni PO1 Nemesio Paragsa hinungdan sa paghuboy niini.
Sa report sa Buena Mano sa GMA-7 kagahapon sa buntag gipakita niini nga nangluwa pa si Miñoza sa mga pulis ug nagpraktis og boksing ug nagpunay’g panghiwi sulod sa selda ug dili pa igo gihagad pa gyud niini og sinukmagay si Chief Insp. Michael Anthony Bastes ang hepe sa Fuente Police station.
“Dili man ta doktor no? Sa akong tan-aw hubog gyud kaayo kini si Miñoza,” matud pang SPO2 Augustine Collano, imbestigador sa Fuente Police station kinsa nakakita usab sa gipangbuhat sa suspek.
Nasuta usab sa kapolisan nga empleyado sa PAO ug sinaligan nga maoy mangabli sa maong buhatan matag buntag. (BANATNEWS)