CEBU, Philippines - Kanhi bise mayor Aberdovey Belleza nga nailang oposisyon sa dakbayan sa Talisay miangkong adunay gisuportahang 15 ka mga kandidato sa pagka-kapitan sa kabarangayan sa maong dakbayan.
Wala hinuon ibutyag ni Belleza kagahapon sa Banat News ang mga pangalan sa maong mga kandidato sa pagka-kapitan gawas lang nga ang uban niini mga daan na niyang kaalyado sa una.
Adunay 22 ka mga barangay ang dakbayan sa Talisay ug pipila sa mga nailhan nang oposisyon sa maong dakbayan maoy adunay daghang residente sanglit sagad naa man sa sentro sa dakbayan.
Matud usab niini usa na siya ka pribadong molupyo sa Talisay ug dili na politiko maong mahimo siyang mosalmot o mosuporta sa bisan kinsang kandidato. Si Belleza naparot sa nakalabay’ng piniliay.
Ang Barangay ug Sangguniang Kabataan elections usa ka non-partisan nga kalihukan maong wala’y partido nga magdala sa usa ka pundok sanglit ang Commission on Elections mikunsiderar sa tanang kandidato nga mga independente bisan paman aduna sila’y pundok nga giapilan.
Wala hinuon palabya ni Belleza ang higayon ug milakbit sa pagsaway sa administrasyon nga gigamit ang city hall alang sa meeting sa grupo sa mga kandidato sa umaabot nga piniliay nga kaalyado sa administrasyon kini bisan paman non-partisan man unta kini nga piniliay.
Ang gipatukod sa city hall kwarta sa mga magbubuhis ug dili unta kini angayang gamiton sa administrasyon sa mao nilang katuyoan.
Apan matud niini “being a tax payer gusto lang ko og kausaban sa Talisay tungod kay diskontento ko sa mga pamaagi sa lokal nga pangagamhanan karon.”
Si Arturo Bas ang public information officer sa Talisay dihang gikahinabi sa Banat News miangkong adunay mga pagtapok-tapok sa mga opisyal sa city hall ug sa barangay officials.
Giklaro dayon niya nga wala kini kalambigitan sa umaabot nga piniliay sa SK ug sa barangay sanglit ang ilang katuyoan mao ang paghisgot ug pagpangita og solusyon sa mga problema ug mga proyekto sa kabarangayan. Giangkon hinuon niyang tungod kay umaabot na ang eleksyon malakbitan kini og hisgot.
Kahinumduman nga si Belleza midagan isip bise mayor sa siyudad ubos sa landong sa Liberal Party atbang kang Bise Mayor Alan Bucao sa Nacionalista Party sa milabay’ng eleksiyon niadtong Mayo 10, 2010 apan naparot kini. (BANATNEWS)