Namalit og scrap gisikop sa mga tanod

CEBU, Philippines - Tulo ka mga lalaki kinsa gipasanginlang kawatan, nasikop kagahapon sa kadlawon sa mga tanod sa barangay Lagtang dakbayan sa Talisay ug gitugyan ngadto sa mga polis.

Ang mga suspetsado kinsa nagtingkagol karon sa Talisay City detention cell mao sila si Ariel Pardillo, 28, Niño Mendoza, 22, ug Vercilio Dejoros, 33, pulos taga barangay Bagacay, dakbayan sa Toledo.

Ang biktima mao ang Carmen Copper Corp.(CCC) nga nahimutang sa Don Andres Soriano, Lutopan sa nahisgutang siyudad.

Ang mga tanod nga nakasikop sa suspetsado mao sila si Julius Enriquez kinsa gwardiya usab sa nahisgutang kompaniya, Ronnie Labajo, Ric Rabaya, Wilson Juezan ug Noymi Laborada.

Si SPO1 Oliver Dacua, duty desk officer sa Talisay City Police Station sa pakighinabi sa Banat News nagkanayon nga si Pardillo maoy drayber sa na-impound nga Isuzu cargo truck nga nagtangag sa plakang GKM-886 mamalitay og mga scrap.

Niadtong higayona si Pardillo ug ang iyang mga kauban diha sa gawas sa nahisgutang establisamento naghuwat ,tungod kay giingong adunay tawo didto sa sulod sa establisamento kinsa maoy mamaligya kanila og mga scrap.

Apan wala mapiho kung ang maong mga tawo nga mamaligya og scrap mga kawani ba sa CCC.

Gikataho nga ang maong kompaniya kanunay’ng mawagtangan og mga scrap iron o mga kabilya.

Dihang napuno na sa mga scrap nga kabilya ang truck, milarga dayon kini paingon sa barangay Lagtang,Talisay aron unta adto ibaligya sa junk shop ang maong mga scrap.

Ang mga tanod nga nag-roving nakadawat na og report kabahin sa mga kinawat nga scrap gikan sa Carmen Copper Corp. ug dihang nakita nila ang truck ila dayon kining gisita ug gipangayoan og mga dokumento bahin sa ilang biyahe uban sa mga karga apan si Pardillo napakyas sa pagpakita og mga papeles hinungdan nga giaresto sila sa tanod.

Nasuta nga ang mga scrap nga ilang gikarga gikan sa Carmen Copper Corp.

Ang sakyanan nga gikargahan sa mga scrap ubos karon sa kostudiya sa mga polis.  (BANAT NEWS)