CEBU, Philippines - Ang kontrobersiyal nga sinagop sa mayor sa dakbayan sa Talisay nga si Joavan Fernandez gipasakaan og kasong pagpanghulga sa kanhi niya babayeng bodyguard ngadto sa Talisay City Prosecutors Office kagahapon sa alas 3:10 sa hapon. Si Guillermina Barrido uban sa upat ka mga polis sa Investigation and Detective Management Branch (IDMB) sa Cebu Provincial Police Office (CPPO) mianha sa buhatan ni Talisay City Prosecutor Marshal Rubia ug mipasaka og kasong grave threat batok kang Fernandez.
Si Rubia sa pakighinabi niini sa Banat News kagahapon mipasabot nga ubos sa Ordinary Preliminary Investigation ang maong kaso diin karong Lunes mopahigayon sila og raffle aron ma-assign kini og investigating prosecutor. Matud ni Rubia nga base sa affidavit ni Barrido mipasangil kining gihulga siya ni Fernandez nga patyon human siya miundang sa pagserbisyo ngadto sa sinagop sa mayor. Ang tanan hinuon pulos gihimakak ni Fernandez ug mipasangil nga bakakon ang reklamante. (BANATNEWS)