Laing kaso gisang-at batok Gwen

CEBU, Philippines - Gipasakaan na usab ni negosyanteng Crisologo Saavedra og kasong paglapas sa Anti-Graft and Corrupt Practices Act si Gobernador Gwen Garcia uban sa mga sakop sa hunta sa Mactan Cebu International Airport Authority (MCIAA) ngadto sa buhatan sa Ombudsman Visayas.

Kini tungod sa giingong pagpatukod sa board sa MCIAA administrative building nga mikantidad og kapin sa P65 milyones apan wala matiwas   kay gipaundang kini dihang may tawo nga miangkong iyang yuta ang gitarokan sa maong edipisyo.

Kauban sa gobernador nga gipasakaan sa maong kaso mao sila si kanhi General Manager sa MCIAA Major Gen. Adelberto Yap, manlalaban Sigredo Dublin, Bienvinido Malayang VII, BAC chairperson Veronica Ordoñes, DOJ Representative Lanto Makabangkit ug tanang mga sakop sa board of directors sa MCIA nga sila si Renato Osmeña, Patricia Aurora Roa, Valerio Bobit Avila, Winglip Chang, Nilo Jatico, Gordon Joseph ug Ma. Lourdes Dedal.

Sumala ni Saavedra nga nakapadala na siya og sulat sa Ombudsman Visayas nga naghangyo nga maimbistigar ang lalisonong pagkatukod sa naasoy nga MCIAA administrative building niadtong 2008.

Kini human niya masayri ang namantalang pag-angkon sa kanhi legal council sa MCIAA ug karon Capitol Consultant on Information Rory Jon Sepulveda nga nagbutyag nga gihunong sa MCIAA board   ang trabaho sa gitukod nga administrative building gumikan sa nag-ung-ong nga kaso sa korte nga gisang-at sa pamilyang Godenez kinsa miangkong silay tag-iya sa lote nga gitarokan sa maong building. Si Saavedra nagkanayon diha sa iyang affidavit of complaint nga ang pamahayag ni Sepulveda maoy lig-ong basehanan nga nakahimo og kalapasan ang mga miyembro sa board sa MCIAA ug magsilbi niyang testigos mao na mismo si Sepulveda.

Gipangayo ni Saavedra sa Ombudsman nga ipaubos sa preventive suspension si Garcia ug kaubanan kun mapamatud-an nga ang mga sakop sa hunta sa MCIAA miabuso sa ilang katungdanan.

Sa iyang bahin si Sepulveda miingon nga andam siyang motestigos sa maong kaso aron mahibaw-an nga walay nasayran si Saavedra sa maong transaction.

Matud pa ni Sepulveda nga nasayod siyang kwestiyonable ang pagtukod ni Yap sa maong proyekto kay wala man kini pagtugot sa board ug mao kini ang usa sa hinungdan nga nahulipan si Yap sa iyang pagka general manager.        Dugang pa niya, nga dili na bag-o alang sa gobernadora ang maong kaso tungod kay nakaduso kini og susamang sumbong si Saavedra sa niaging tuig 2008 didto gihapon sa Ombudsman. (BANAT NEWS)