Motorsiklo misampak sa bato drayber tipi

CEBU, Philippines - Patay nang nahidangat sa tambalanan ang usa ka batan-ong lalaki human mawad-i og preno ang gimaneho niining motorsiklo nga midasmag sa dakong bato daplin sa karsada sa sitio Camandang barangay Tigues sa lungsod sa Poro isla sa Camotes niadtong Biyernes sa alas 9:00 sa buntag.

Ang biktima mao si Policarpio Delicano, molupyo sa barangay Gakgakan, Poro.

Subay sa imbestigasyon sa kapulisan sa gipadangat nga report diha sa operations branch sa Cebu Police Provincial Office (CPPO) nasuta nga ang biktima sakay sa iyang motorsiklo paingon sa amihanan nga kusog kaayo ang pagpadagan ug wala magsul-ob og helmet.

Matud pa nga kalit lang nawad-an sa preno ang motorsiklo sa biktima hinungdan nga nawad-an kini og kontrol ug aksidenteng mibangga sa dakung bato daplin sa karsada.

Tungod niini nalabay kini ug nabuwag sa iyang motorsiklo ug didto motugpa sa dakong bato nga maoy hinungdan nga nakaangkon og seryosong kadaut sa kalawasan ug ang ulo napakong sa bato.

Gisuwayan pa unta og tabang ang biktima sa mga molupyo sa maong lugar ug gihatud sa San Francisco District Hospital apan gideklarar kini nga dead on arrival.   (BANATNEWS)