CEBU, Philippines - Unom ka tawo ang nasikop samtang usa ka abandonadong armas usab ang nahipos sa kapolisan sulod sa lima ka adlaw sa pagpatuman sa Comelec gun ban sa nagkadaiyang lugar sa lalawigan sa Sugbo.
Base sa natala sa listahan sa mga nasikop sa buhatan sa Cebu Provincial Police Office Operation department, adunay pito ka tawo sa nagkadaiyang lugar sa lalawigan sa Sugbo sama sa syudad sa Toledo, mga lungsod sa Barili, Moalboal, Bogo, Carcar ug Naga.
Ang mga nasikop mao sila Mark Anthony “Tonton” Pahaganas Dolino uban sa iyang kalibre .22 rebolber nga adunay duha ka buhing bala ug usa ka spent shell ug Alexander Ypil Indac nga nakuhaan og pugakhang kinsa pulos taga syudad sa Toledo, Roel Altamarino Salarde, 24, nga taga Moalboal nga nasakmitan og kalibre .38 nga adunay upat ka buhing bala, usa ka 17-anyos nga taga Bogo ang nasakmitan og kalibre .38 rebolber nga adunay upat ka buhing bala ug usa ka kutsilyo , Agapito Lauron Cabungcal, 22, diin nasakmitan og kalibre .45 Colt ug adunay upat ka buhing bala ug Ronalito Librando, 26, nga nabawian og .45 nga adunay 10 ka buhing bala didto sa Carcar.
Samtang usa ka abandonadong armas nga kalibre .38 ang napalgan usab sa kapolisan sa lungsod sa Barili. (BANATNEWS)