78 IB nanglimpyo sa baybayon

CEBU, Philippines - Mipahigayon og coastal clean up drive ang pipila ka sundalo sa 78th Infantry Batallion isip tabang nila sa 14 ka barangay sa lungsod sa Tuburan sa miaging adlaw.

Ang maong cleanup drive gipangulohan ni Major Juanito Abecia uban sa 30 ka sakop sa Stormtrooper division, kadagkuan sa Local Government Units, Bureau of Fire and Protection, Non-Government Organization (Kabalikat and Guardians Brotherhood, kapolisan sa lungsod sa Tuburan ug Regional Public Safety Battalion 7.

Ang 14 ka barangay mao ang barangay Putat, Bagasawe, Apalan, Daan Lungsod, barangay Uno, barangay 3, barangay 4, barangay 6, barangay 8, Mangga, Carmelo, Molobolo, Sto. Niño ug Antipolo.

Sa pakighinabi sa Banat News ni 1Lt. Alberto Ramirez , media relation officer sa 78th IB, siya mibutyag nga ang ilang katuyoan sa maong cleanup drive mao ang pagpangandam alang sa ilang ipahigayon nga pagpananum og bakhaw sa maong mga barangay.

Kini aron usab mahatagan og kinabuhi ang mga baybayon ug may kaitlogan usab ang mga isda nga maoy panginabuhi-an sa pipila ka molupyo sa maong mga dapit.

Gihulgaway ni Ramirez nga nahuman dayon ang maong pagpanghinlo sulod lang sa tunga sa adlaw tungod sa ilang pagtinabangay.

Matud pa ni Ramirez nga dako ang ilang pasalamat ilabi na ang ilang labaw nga si Commander Nolasco Mempin ngadto sa kadagkuan sa LGU sa maong lungsod sa paghatag kanila og higayon nga makatabang sa ilang isig ka tawo.

Midugang si Ramirez nga ang ilang serbisyo dili lang sa pagprotiher sa katawhan kundili motabang usab sa kaayohan sa mga molupyo. – BANAT NEWS