Cebu Press supak sa lakang sa Kongreso

CEBU, Philippines - Ang Cebu Citizens-Press Coucil (CCPC) miawhag kang Presidente Benigno Aquino III nga itugyan nalang niini ngadto sa tagsa-tagsa ka kahugpongan sa prensa ang katungdanan sa pag-ila sa tulubagon kun ugaling aduna man, sa tulo ka mga broadcast network ug duha ka mga magsisibya nga girekomendar sa Department of Justice nga pasakaan og kaso sa hukmanan gumikan sa kalambigitan nila sa napakyas nga krisis sa pagpang-hostage nga mikalas sa walo ka kinabuhi sa mga turistang taga Hong Kong niadtong Agosto 23, 2010 didto sa Quirino Grandstand sa Manila.

Sa usa ka resolusyon nga gilig-on ug giduso sa CCPC ngadto sa Malacanang, kini nag-awhag usab sa Senado ug sa Ubos Balay Balauranan nga tugotan ang media sa pagkontrolar sa ilang kaugalingon ubos sa mekanismo sa industriya ug sa ilang tagsa-tagsa ka kahugpongan sa pamalita.

Ang maong resolusyon nga gitakdang lig-onon sa CCPC atol sa en banc meeting niini nga ipahigayon didto sa Marcelo B. Fernan Cebu Press Center sa barangay Lahug, dakbayan sa Sugbo niining adlawa, Septembre 23, nag-awhag usab kini sa mga magbabalaod sa duha ka mga chamber nga kun ugaling mapakyas man ang tagsa-tagsa ka press organization sa pagpatunhay sa hustisya nga malinawon, isandig nalang ang paghusay niini pinaagi sa kasamtangang balaod sibil o kriminal, nga dili na kinahanglang himoan pa og bag-ong balaod sa Kongreso.

Ang maong resolusyon gipanday sa mga sakop sa hunta sa CCPC sa kabalaka nga ang gilaraw sa Kongreso nga maggama og balaod nga mogobyerno sa panahon sa mga krisis nga panghitabo, gikabalak-ang mopig-ot sa kagawasan sa pamalita.

Sa maong resolusyon, gitumbok niini ang kabalaka nga pinaagi sa bag-ong balaod nga pandayon sa mga magbabalaod sa nasud may dakong peligro nga abusohan kini sa mga tigpatuman sa balaod ug sa mapahimuslanong mga politiko, ilabi na nga wala na kini matukma sa Batakang Balaod.

Naumol ang maong resolusyon dihang gihulga sa prosecution ang duha ka broadcast journalist ug tulo ka broadcast network nga mikuha og balita atol sa krisis sa pagpang-hostage niadtong Agosto 23, 2010, nga namatyan og walo ka mga turistang taga Hong Kong.

Didto ipasikad sa mga magbalaod sa nasud nga moumol sila og balaod nga mopig-ot na usab sa kagawasan sa mga tigbalita sa pagpadayag sa mga butang nga angayang ibutyag niini ngadto sa katawhan.

Napanglangtawan sa mga opisyal sa CCPC nga ang kapakyas sa kagamhanan sa pagsulbad sa maong krisis, nga ang taga media maoy pasanginlan ug maoy han-ukan sa kasalanan.

Matud pa sa resolusyon sa CCPC nga ang broadcast media may kaugalingong basahon sa balaod nga nagsilbing Biblia niini nga mopitol sa mga miyembro nga maligas sa pagsubay, mahimong tinuyo o dili. - BANAT NEWS