Sikad driver nag-gun runner

CEBU, Philippines – Usa ka traysikad drayber nga gituohang gun-runner nadakpan sa kapolisan ug nakuhaan og nagkadaiyang klase sa kalibre sa armas atol sa checkpoint kagahapon sa buntag sa dalan Urot, duol sa usa ka dakong establisamento nga utlanan sa Cebu City ug Mandaue City.

Ang mga armas gikan sa dakbayan sa Danao ug dad-on unta paingon sa lalawigan sa Leyte.

Ang Task Force Motorsiklo sa Cebu City Police Office (CCPO) nga gipangulohan ni Supt. Pablo Labra II mipahigayon og checkpoint alas 9 kagahapon sa buntag sa nahisgutang lugar nga miresulta sa pagkasikop ni Joel Almadin, 31, minyo, taga barangay Poblacion, dakbayan sa Danao.

Nakuha sa kapolisan ang usa ka Bushmaster .9mm machine pistol, usa ka silencer, duha ka magazine clip, usa ka KG .9mm machine pistol, silencer sa KG 9mm, duha ka magazine clip, napulo ka buhing bala sa .9mm, duha ka Smith and Wesson nga .38 caliber revolver, tulo ka North American Arms .22 caliber revolver, usa ka .357 power custom revolver nga dunay unom ka mga buhing bala.

Ang nahisgutang mga armas ug bala ingon man magazine gisulod sa bag ni Almadin.

Si Sr. Supt. Melvin Buenafe, hepe sa CCPO, nagkanayon nga sayo kagahapon sa buntag nakadawat sila og report kabahin sa usa ka lalaki nga nagdala og armas nga gisulod og bag nga paingon sa dakbayan sa Sugbo.

Daling gimanduan si Labra nga mohimo og checkpoint sa utlanan sa Cebu City ug Mandaue.

Gipara sa kapolisan ang tanang PUJ nga nagbiyahean gikan sa amihanan nga miresulta sa pagkasikop ni Almadin.

Matud sa kapolisan nga wala hinuon mopakita og pagsukol si Almadin sa dihang gidakop human masuta nga pulos armas ang sulod sa gidala niining bag.

Apan si Almadin sa iyang bahin nangatarungan nga tungod sa kawad-on dili paigo ang iyang kinitaan pagmaneho og traysikad ug napugos siya pagsulod sa maong matang sa kalihukan.

Matud niya nga ang maong mga armas adto dad-on sa lalawigan sa Leyte apan igo ra siyang gisugo sa pagpahatod niini sa Pier 3 kay adunay mosugat nga tawo diha sa pantalan.

Apan si Buenafe nagtuong ang mga armas posibling gamiton sa umaabot barangay ug SK election sunod bulan. (BANAT NEWS)