CEBU, Philippines - Gipaluyohan ni Provincial Board Member Thadeo Ouano ang lakang nga gihimo ni 6th District Representative Gabriel Luis Quisumbing nga pagtakli sa Consolacion Community College (CCC) ngadto na sa pagka state college niini.
Gihimo ni Board Member Ouano ang iyang suporta pinaagi sa iyang gipalabang nga resolusyon pabor niini.
Matud pa ni Ouano nga ang pagkonberter sa CCC ngadto sa pagka-state college mahimong paagi aron kini kagahinan na sa pahat nga iya sa nasudnong kagamhanan.
Gitataw ni Ouano nga dako usab kaayo kini og ikatabang sa mga kabus nga estudyante kay mas minus man ang bayranan nila sa martikula sa kolehiyo nga iya sa gobyerno.
Matud pa ni Ouano nga gumikan sa kadaghang mga ginikanan nga nag-ilaid sa kakabus, dili na makapatungha sa ilang mga anak sa kolehiyo kay walay ikagasto.
Maoy hinungdan nga dili gyud makakita og mga maayong trabaho sanglit kutob ra sa high school ang mga kabus nga mga anak, matud pa niya.
Alang kang Ouano nga pabor kaayo siya kun matag lungsod katukoran og kolehiyo nga iya sa gobyerno aron ang mga kabus nga estudyante siguradong makalampos sa pagtungha sa kolehiyo nga gradwado og kurso. (BANATNEWS)