CEBU, Philippines - Si PRO-7 Chief Supt. Ager Ontog mibutyag nga higpit nang ipatuman ang gun ban karong Septiyembre 25 hinungdan iyang gipahinumdoman ang iyang mga sakop sa pagsunod sa maong balaod sa Comelec.
Si Ontog mitataw nga walay kalainan sa milabay’ng eleksyon ang ilang himuong preparasyon karong umaabot nga eleksyon sa barangay ug Sangguniang Kabataan sa Oktobre 25.
Iyang ipakatap ang mga sakop sa intelligence team nga maoy maniid sa kalihokan sa grupo nga posibleng nagplano paghimo og kagubot atol sa adlaw sa eleksyon.
Si Ontog milarga sa miaging gabii ngadto sa kaulohan aron motambong sa usa ka command conference sa tanang mga regional director sa tibuok nasud aron tukion ang bahin sa preparasyon sa seguridad alang sa umaabot nga eleksyon sa Oktobre.
Inig balik niya dinhi sa Sugbo, si Ontog makigtagbo usab sa tanang mga direktor sa kapolisan sa dakbayan ug sa lalawigan aron pahibaw-on bahin sa ilang gimitingan didto sa Camp Crame.
Malaumon hinuon siya nga malinawom ra ang barangay eleksyon karong Oktobre sama sa eleksyon niadtong Mayo nga walay mga panghitabo nga mitumaw. – BANAT NEWS