Promo sa isla sa Mactan gikagat sa mga turista

CEBU, Philippines - Positibo ang resulta sa promosyon sa kagamhanan sa dakbayan sa Lapulapu nga “Lapulapu the Island of Experience” alang sa pagtabang sa mga hotel ug mga resort nga naalkanse gumikan sa pagkanselar sa mga bookings sa mga langyaw dinhi sa isla sa Mactan mugna niadtong palpak nga operasyon sa hostage-taking sa Manila.

Si Eric Monsanto, PIO sa dakbayan sa Lapulapu nagkanayon nga base sa pag-monitor sa mga hotel ug restaurant, daghan na ang buot moanhi sa Lapulapu gikan sa ubang dapit sa nasud.

Ubay-ubay na usab ang nanawag sa City Tourism Commission Office pagpakisayod sa mga discounted promo rates sa mga hotel.

Gumikan niini, ang pipila sa mga negosyante sa dakbayan sa Lapulapu buot mosalmot sa paghatag og mga diskwento ngadto sa mga bakasyonista sa isla sa Mactan.

Matud pa ni Monsanto nga lakip sa gagmay’ng hotel ug resort mohatag usab og pabor sa mga lokal nga turista.

Ang duha ka mall sa Lapulapu moabag usab sa proyekto sa dakbayan, ilabi na sa pag-promote ngadto sa katawhan.

Dako usab ang gikatabang ni Mutya ng Pilipinas 2nd Runner Up Miss Sharon Grace Angel human kini nahimong Ambasador for Lapulapu Island of Experience nga nagtabang sa pag-promote sa mga dumoduong sa Lapulapu.

Kining promo nga gipatuman sa mga hotel ug resort sa Mactan gipatuman human niadtong hostage crisis sa Quirino Grandstand nga mikalas sa kinabuhi   sa     walo ka mga turista gikan sa Hong Kong ug sa hostage-taker nga si Sr. Insp. Rolando Mendoza.

Gumikan niini, si Mayor Paz Radaza sa Lapulapu mihimo og mga lakang paghatag og higayon sa mga hotel ug resort nga dili maalkanse ang mga negosyante sa Lapulapu. – BANAT NEWS