CEBU, Philippines - Patay ang usa ka kawani sa munisipyo sa Tubigon, Bohol ug ang mangalanak niyang asawa dihang gi-ambush sa duha ka wala mailhing lalaking luwan og motorsiklo kagahapon sa buntag.
Si PO2 Rene Astronomo sa Tubigon Police Station sa pakighinabi sa Banat News miila sa namatay nga mao sila si Alfonsos Boligao,34, ug Maricor Boligao, 26, kinsa mangalanak karong adlawa.
Ang mga mamumuno sumala pa sa testigong nakahinabi sa kapolisan miingon nga luwan sa usa ka kolor itom nga motorsiklo ang duha apan walay plate number kinsa daling misutoy padulong sa Tagbilaran human sa hitabo.
Ang mga biktima sumala pang Astronomo luwan sa ilang awto nga Toyota Corona subay sa National Highway sa sitio Pook sa barangay Occidental, Tubigon, Bohol sa dihang gibanhigan.
Matud pa sa imbestigasyon nga nasigpatan ang mga gikatahapan nga nagsunod sa maong awto ug dihang nakasikit, kalit nga girakrakan sa nag-angkas nga lalaki ang awto sa magtiayon.
Wala mailhi ang mga gikatahapan gumikan kay giingong pulos sila nagtaptap sa ilang mga nawong.
Ang lalaking si Boligao nakaangkon og usa ka samad pinusilan sa iyang likod ug dead on arrival sa Tubigon District Hospital samtang ang kapikas niini naigo kaduha sa likod ug gidala sa usa sa mga lokal nga tambalanan apan gumikan sa kahimtang gidali unta kini pagdala sa Tagbilaran apan nakabsan gihapon sa kinabuhi.
Si SPO3 Fernando Peroramas nagkanayon nga si Alfonsos nakasuhan kaniadto og murder apan nahusay ra kini apan dili palang dugay napusilan kini sa tiil ug karon padayon pang gihusay ang kaso. - BANAT NEWS