Pag-eskapo sa bata gikasagmuyo sa polis

CEBU, Philippines - Nasagmuyo ang kapolisan sa Lapulapu City Police Office gumikan sa pag-eskapo sa usa ka minor de edad sa milabay’ng kaadlawon gikan sa Department of Social Welfare and Development (DSWD) sa dakbayan sa Lapulapu.

Si Insp. Jacinto Mandal Jr. miingon nga naghago sila sa pagsikop sa 17-anyos nga nalambigit sa pagtulis ug pagpatay sa empleyado sa Mactan Export Processing Zone sa milabay’ng kadlawon. Ang gitulis niini nahabwaan gyud sa tinai.

Nagtagotago ang maong suspek apan sa pipila ka adlaw nasikop sa mga operatiba sa LCPO sa ilang balay sa sitio Humayhumay, dakbayan sa Lapulapu.

Gumikan kay usa ka minor de edad, gitugyan kini sa kapolisan ngadto sa DSWD-Lapulapu alang sa tukmang disposisyon, apan matud ni Insp. Mandal nga maoy Officer of the Day atol sa pagkasikop niini nga nakugang sila sa pagkasayod nga naka-eskapo kini sa dihang ila na untang pasakaan og kaso ngadto sa piskaliya.

Nasuta ni Insp. Mandal nga naka-eskapo ang 17-anyos pinaagi sa pagguba sa bintana sa luyo sa DSWD temporary shelter nga nahimutang tupad sa Lapulapu City Hall.

Ang maong minor de edad maoy suspek sa pagtulis ug pagpatay kang Arjie Panuncial niadtong Septiyembre 8. – BANAT NEWS