Lalaking nanagpa sulod sa diskohan gipusil patay sa iyang gisagpa

CEBU, Philippines - Usa ka lalaking nanagpa sulod sa diskohan gipusil patay sa iyang gisagpa atol sa piyesta didto sa Sitio Upper Bantigue, barangay Agujo, lungsod sa Daanbantayan kagahapon sa kaadlawon.

Ang biktima mao si Marianito Ariesgado Pitogo Jr., 26, minyo, nga taga Upper Bantigue, samtang ang suspetsado nailhan usab nga si Gaudioso Sontousidad alyas “Dyuso”, hingkod, nga taga Sitio Malokbalok, pulos sakop sa barangay Agujo.

Si PO2 Alfredo Mandal sa Daanbantayan Police mibutyag sa Banat News  nga nagkalalis ang biktima ug ang suspetsado sa sulod sa diskohan ug gumikan sa kagaan sa iyang kamot, gisagpa ang naulahi.

Matud pa sa kapolisan nga mipauli ang suspek apan sa pagbalik niini gipusil dayon ang biktima sulod sa diskohan nga maoy nakahunong sa kasadya sa sinayaway sa mga nanisko niadtong tungora.

Daling gihatod ngadto sa Daanbantayan District Hospital ang biktima apan gideklarar kining dead on arrival, samtang padayon pang gipangita sa kapolisan ang suspetsado kinsa nakasibat dayon human sa hitabo. (BANATNEWS)