Taga barangay Looc mihangyo pakanalan ang maong lugar

CEBU, Philippines - Gireklamo sa mga molupyo sa sitio Calubihan sa barangay Looc, dakbayan sa Mandaue ang padayon nga pagpundo sa tubig sa maong dapit sanglit kay dako kining hulga sa panglawas kun kapuy-an kini og lamok nga may dengue.

Ang nagpundong tubig nga walay paghubas ilabi na niining panahon sa ting-ulan miawas na ngadto sa dalan Juan M. Ceniza sa atubangan nga bahin sa Land Transportation Office (LTO) sa barangay Looc. Si Dr. Danilo Dionson nga nagpuyo sa maong lugar ug nagbaton usab og drug testing center sa maong lugar dihang nahinabi sa Banat News miingon nga nahimo nilang problema ang maong lugar tungod sa daghan kaayong illegal nga estraktura nga nahimutang sa daplin sa kadalanan.

Nunot sa paglimpiyo sa naglu-oy nga tubig sa maong dalan gipangayo sa mga molupyo sa maong dapit nga butangan og kanal ang maong dapit sa kagamhanan.

Si Roger Paller nga maoy information officer ni Mayor Jonas Cortes nga nahinabi sa mga tigbalita nagkanayon nga pirmado na sa mayor ang maong mando alang sa engineering department aron ugmaron ang kanal sa maong dapit.

Matud pa sa mga molupyo nga pinaagi sa maong kanal masulbad na ang maong suliran ug kabalaka bahin sa dakong hulga sa dengue.

Matud pa ni Paller nga una molarga ngadto sa China si Mayor Cortes daan na kining nagtugon nga kinahanglang inig-uli niya human na og trabaho ang maong kanal. (BANAT NEWS)